ළිහිණිගේ ජීවිතය

පුංචිම කාලේදි අපි “ ජීවිතය “ දැක්කෙ මොන තරම් සැහැල්ලුවටද ? එතකොට අපිට ජීවිතය ගැන බරක් පතලක් දැනුනද ? හිත්වල ප්‍රශ්ණ කියන ඒවා තිබුනද ? තිබුනත් ඒවා අපිට දැනුනද ? ඉස්කෝලේ යන එකයි, සෙල්ලම් කරන එකයි, කන බොන දේවලුයි ඇරෙන්න දෙයක් අපට ඕනා උනාද ?

ඒත් අපි වයසින් වැඩෙද්දී...... අපේ එකින් එක අවශ්‍යතා වැඩිවෙද්දී.... ප්‍රශ්ණ ගැටළු අපේ ඉස්සරහා කරණම් ගහද්දී.... අපිට ජීවිතය ගැන දැණුනු බර මොන තරමක්ද ?

බය නැතුව ජීවිතයට මුණ දීලා ජීවිතය සාර්ථක කරගත්තු මිනිස්සු වගේම , අනුන්ව රවට්ටලා හරි තමන්ගේ ජීවිතය ගොඩ දා ගත්තු  මිනිස්සු , ජීවිතයෙන් බැට කාලා බැරිම තැනදී මරණය වැළඳ ගත්තු මිනිස්සු වගේම ජීවිතයෙන් හෙම්බත් වෙලා දුකින් මිරිකිලා රහසින් හඬා වැටෙමින් ජීවත් වෙන මිනිස්සුත් කොයි තරමක් අපි අතරේ ඇතිද ?

තාවකාලිකව මේ ලෝකයේ නවතින්න අනුන්ගෙන් ලැබුන අපේ ජීවිත ගෙවී යන්නේ අපිට ඕනෑ හැටියටද ? නැත්තම් ...අපිට නොපෙනී ඉඳන් අපිව පාලනය කරන තව කාට හරි ඕනෑ හැටියටද ?

හිතන්න ගියාම ඔළුවත් අවුල් වෙන...වෙලාවකට " මේ මොකද්ද " කියලා හිතෙන අපේ ජීවිත....අනේ මන්දා...

මම ළිහිණි....ඔය මම කියාගෙන ආපු ජීවිතය අස්සේ අතරමං උන...ඒත් කාලයක් ගියාම ඒ ජීවිතය දිහා උපේක්ෂාවෙන් බලන්න පුරුදු උන, මේ මහ පොළොවෙම ජීවත් වෙන තවත් එක මනුස්ස පරාණයක්... ගැහැණියක්..

කාලයක් තිස්සේ බ්ලොග් අස්සෙ කරක් ගහ ගහ බ්ලොග්  කියෙව්වත්..ලියන්නවත්...කොමෙන්ටුවක් දාන්නවත් හිතුවේ නැති කෙනෙක්.. ඒත් අන්තිමේදී මට හිතුනා ලියන්න... මම ගත කරපු ජීවිතය ගැන කල්පනා කරද්දී ,මට හිතෙන්නෙ සමහර තැන් මට වැරදුනා සහ මා විසින්ම වරද්දා ගත්තා කියලයි. මට හරියි කියලා ගත්ත සමහර තීරණ මේක කියවන තව කෙනෙකුට හිතෙයි වැරදියි කියලා. කොහොම නමුත්... සර්වසම්පූර්ණ මිනිස්සු නැති ලෝකයක මටත් සර්වසම්පූර්ණ මනුස්ස දුවක් වෙන්න අවස්ථාවක් ලැබුනේ නෑ... ඒක මනුස්සයන්ගේ දුර්වලකමක් වෙන්නැති කියලා හිත හදා ගන්නෙ නැතිව.... ඒ ගැන ලියන්න..කතා කරන්න මම කැමතියි..

මම මේ හැම දෙයක් නොහංගා ලියන්න අදහස් කලේ කාගෙන්වත් අනුකම්පාවක් බලාපොරොත්තුව නම් නෙමේ... එහෙම අනුකම්පාවක් ලැබුනාය කියලා මට අමුතුවෙන් මට ලැබෙන දෙයකුත් නෑනෙ. ඒත් හිතක් අස්සෙ තියෙන දේවල් කුරුටු ගාද්දී සැනසීමක් ලැබෙනවලු. මම එහෙම අහලා තියෙනවා…ඒක ඇත්තක් වෙයිද කියලා බලමු...

මම ලියන සමහර දේවල් කියවද්දී " මේකී පුදුම ගෑණියෙක්නෙ " කියන සිතුවිල්ල කාගේ හරි හිතකට දැනුනොත්...ඒ බව නොහංගා කියන්න. ඒ වගේ වැරදි මගේ අතින් විතරක් නෙමේ කාගෙ අතින් උනත් සිද්ධ වෙන්න පුළුවන් ... විශේෂයෙන්ම....ගැහැණියක් වෙලා ඉපදෙන කෙනෙකුට " ජීවිතය " කියන්නෙ අභියෝගයක්... ඒ අභියෝගයට සාර්ථකව මූණ දෙන්න හැමෝටම ඉඩක් නැති නිසා...

ඉතින්...ඉඩක් වෙතොත් ළිහිණිගේ ජීවිතය කියවන්න...